Почина Александар Ѓурчинов, филмски режисер и сценарист. Ѓурчинов со своето работење остави силна трага во зачетоците на македонската кинематографија. Добитник е на бројни награди и признанија, но две негови дела ќе останат трајно врежани во историјатот на македонската кинематографија.
Најпознатиот филм на Ѓурчинов е “Исправи се Делфина”, за којшто ја добива Бронзената арена за режија на Филмскиот фестивал во Пула, Третата награда за сценарио на фестивалот во Врњачка Бања, потоа Наградата ЦИДАЛЦ (1978), Наградата за најдобар дебитант од весникот „Зум репортер“ (1977) во Пула и други.
Второто дело со кое Ѓурчинов стана познар е документарниот филм “Весници, Весници” за што е награден со државната награда 11 Октомври (1966).
Ѓурчинов во 1962 година дипломира уметност во Белград. Долги години се занимаваше со киноаматеризам. Во 1958 година го добива првиот професионален ангажман на филм, како асистент по режија во копродукцискиот филм “Дубровски” на режисерот Вилијам Дитерле.
Ѓурчинов бил и асистент и помошник-режисер на повеќе режисери, меѓу кои е и познатиот француски режисер Кристијан Жак, кај кого работел за време на студискиот престој во Париз.
Долги години Ѓурчинов беше директор на „Македонија филм“ од каде даде сесрден придонес за македонската кинематографија.