По неколкугодишна битка со канцер на мозокот, познатиот руски баритон, Дмитриј Хворостовски почина утрово опкружен со своето семејство, во неговиот дом во близина на Лондон.
„Во име на семејството Хворостовски, со голема тага во срцата, ви соопштуваме дека почина Дмитриј Хворостовски – сакан оперски баритон, сопруг, татко, син и пријател – на возраст од 55 години. По две и полгодишна битка со рак на мозокот, тој мирно почина ова утро, (22 ноември), опкружен со семејството во близина на неговиот дом во Лондон, Велика Британија. Нека топлината на неговиот глас и неговиот дух секогаш да биде со нас“, напишаа членовите на неговото семејство на официјалниот профил на Фејсбук на уметникот.
Дмитриј Хворостовки е прв оперски пејач кој одржал солистички концерт со оркестар и хор на Црвениот Плоштад во Москва емитуван во повеќе од 25 земји.
Хворостовски настапи во 2013 година на „Охридско лето“, а по веста за неговата смрт, Фестивалот излезе со соопстение:
-Вечно ќе му бидеме благодарни на овој музички гениј, кој на отворањето на „Охридското лето“ во 2013 година одржа спектакуларен концерт во Античкиот театар.
Од Дирекцијата наведуваат дека Хворостовски одушевил со неговата скромност и харизма и дека ќе остане запишан во фестивалската историја како еден од најголемите ѕвезди кои настапиле на „Охридско лето“.
– Македонската публика е многу топла и пријателска. Бев многу среќен што пеев на оваа сцена, возбуден од целата убавина што ме опкружува. Сигурно пак ќе дојдам со моето семејство – рече тој по концертот во Охрид каде пристигна заедно со синот Максим