Починатиот 44 годишен маж кој бил позитивен на коронавирус бил градежен работник од Албанија кој престојувал во Кавадарци во изнајмен стан каде што живеел сам. Тој од 31 март престанал да оди на работа, а се претпоставува дека веќе три дена бил починат.
Кај него постмортем е земен брис и истиот вчера потврдил присуство на вирусот. Во Центарот за јавно здравје во Кавадарци за НОВА потврдија дека се пронајдени луѓето со кои контактирал, земен е брис за тестирање и ставени се во изолација од 14 дена.
„Починатиот 44 годишен маж не бил регистриран како заболен, ниту побарал лекарска помош претходно“. потврдија за НОВА од Центарот за јавно здравје во Кавадарци..
Неофицијално, брис им е земен на тројца странци, тоа се луѓе кои што од Албанија престојувале и работеле во Кавадарци заедно со него. Досега се лоцирани и тројца други граѓани со кои бил во контакт починатиот, но списокот не е конечен бидејќи се работи на пронаоѓање на луѓето.
Наводно, во изолација се ставени и седум полициски службеници, како и вработени во Обвинителство кои без заштитна опрема влегле во станот каде што било телото на починатиот.
Епидемиолошката анкета е во тек и се очекува надлежните од Министерството за здравство да излезат со официјални информации и повеќе детали за случајот.