Неколку илјади граѓани донесени од повеќе градови со десетици автобуси во моментов се движат од Олимпискиот базен во Скопје кон Зелениот пазар. Екипата на НОВА изброја околу 40 автобуси со кои луѓето се собирале за да присуствуваат на контрапротест.
Во моментов ситуацијата е мирна, демонстрантите ја пеат „Земјо македонска“, а контрапротестот беше најавено дека ќе започне во 19 часот. Тие бараат Иванов да не ги амнестира од одговорност Зоран Заев и Зоран Верушевски.
На само неколку метри од нив, односно пред Собранието веќе е започнат масовен протест на граѓаните на кои се приклучи и опозицијата. Граѓаните бараат претседателот да поднесе оставка по одлуката за колективна аболиција на 56 лица. Според нив секој кој направил криминал треба за тоа да одговара без разлика дали е од власта или опозицијата.
Кордон од полиција ги спречува премините од едната до другата страна.
Инаку денеска на социјалните мрежи кружи фотографија на која се гледа смс-пораки со кои е вршело притисок врз граѓаните да излезат на контрапротест денеска, по што на Твитер реагираше и американската амбасада.
