Во Министерството за здравство денеска пристигнаа три илјади тестови, дел од донацијата од 13.000 брзи тестови. Тие се најнова технологија со која за 15 минути се утврдува дали кај тестираниот е присутен вирусот ковид-19. Останатиот дел од тестовите ќе биде испорачан до среда.
Институтот за јавно здравје (ИЈЗ) од вчера почна со телефонски закажувања за приватни тестирања за ковид-19 и за тестирања за сертификат за патување во странство, за разлика од досега, кога се одеше без закажување и се создаваше метеж. Закажувањето, како што стои на нивната официјална страна, се врши на телефонскиот број 075/276-132. Терминот се закажува секој ден од 8:30 до 14 часот, цената е 1.850 денари.
Овие брзи тестови се бесплатни за граѓаните, а ќе бидат распоредени низ 13-те болници во државата, во Клиниката за инфективни болести во Скопје, Болницата „8-ми Септември“, Институт за белодробни заболувања кај децата – Козле и ЈЗУ Институт за белодробни заболувања и туберкулоза-Скопје, и ќе се користат како би се утврдило дали суспектните пациенти се позитивни на ковид-19.
– Tоа се најнови тестови, најнова технологија, со тоа уште повеќе се зголемува капацитетот на сите државни лаборатории и тоа ќе стане и редовна пракса на тестирање – најави претходно министерот Венко Филипче.
Здравствениот дом Скопје е прва здравствена организација во земјава што почна со изработка на брзите тестови. Станува збор за тестови од фирмата Abbott кои даваат 99,6 отсто точност на резултатот.
Во однос на постапката со овие тестови, прво се зема брис назоферигијално, потоа се става во епрувета во која има течност, потребно е од 15 до 20 минути, на една плочка се капнува каде што веднаш се добива резултатот.
Доколку е лицето позитивно, веднаш во текот на денот ќе биде известено од Институтот за јавно здравје кој понатаму ќе постапи со епидемиолошка анкета за лицето да биде ставено во изолација.
Донацијата ја обезбедија ГД Гранит и нафтената компанија „Галф оил Македонија“