Обвинителството за организиран криминал подигнало обвинение за случајот Фаланга 2- против 16 луѓе меѓу кои е и Паско Кузман, кој се наоѓа во домашен притвор.
Кузман беше уапсен под сомнение дека ја злоупотребил службената положба, односно дека спротивно на законот издал согласност на приватни лица за ископување на две локации – едната во катлановско, другата во делчевско.
Адвокатот на Кузман, Александар Новаковски според најавите ќе поднесе приговорот на обвинението, со образложение дека не постојат елементи на кривичното дело за кое се товари Кузман и дека нема поврзаност со делата за кои се обвинуваат останатите во Фаланга 2.
Минатата недела адвокатот поднел гаранција во имот, односно семејната кука во Охрид и ниви, за Кузман да се брани од слобода.
Останатите обвинети кои во мај паднаа во акцијата Фаланга два се осомничени дека вршеле илегални ископувања и одземале археолошки предмети од непроценлива вредност, кои потоа ги продавале во странство. Нивните адвокати реагираа дека воопшто не станува збор за артефакти бидејќи дел од предметите кои им беа запленети истражниот судија им ги врати затоа што биле копии.
Судењето за Фаланга 2 се очекува да започне во септември во скопскиот кривичен суд, откако обвинението ќе стане правосилно и ќе се закаже датум.