Поглаварите на верските заедници во земјава со соопштение ги повикаа граѓаните на претстојните избори слободно да излезат и да дадат свој придонес во изборот на идниот претседател на државата и идниот владин состав, а со тоа и да си го искористат своето право загарантирано со Уставот.
Во соопштението потпишано од поглаварите на Македонската православна црква-Охридска архиепископија, на Исламската верска заедница, на Католичката црква, Евангелско-методистичката црква и Еврејската верска заедница, се наведува дека сите имаме одговорност за иднината и просперитетот на државата.
„Да потврдиме дека сме земја и луѓе со демократски и државотворен капацитет, со меѓународни принципи, но пред сè следбеници на вистински религиозни и духовни вредности. Слободата на изборот е основно човеково право, кое не е само придобивка на современото демократско општество, туку е фундаментален дел и од учењето на секоја религија“, се вели во соопштението.
Поглаварите на верските заедници посочуваат дека слободата во изборот, што е цел на волјата на сите граѓани и на нивното убедување или, пак, моментно расположение, мора да биде разумна, да биде достоинствена, пред се во согласност со позитивните законски прописи на општеството, односно државата во која живеат и, секако, во согласност со основниот природен морален кодекс со кои сите се создадени од Бога.
„Ниедна религија во светот не повикува, не проповеда човекот да излезе од рамките на својата егзистенцијална матрица, односно од својот идентитет на добро, разумно и културно битие“, стои во заедничкото соопштение на поглаварите на верските заедници во Република Македонија.