Со голем пораст на бројот на болни и изнемоштени лица во однос на првиот круг од пред две недели, денеска од 7 до 19 часот се одвиваше гласањето на лицата што се пријавиле како болни и изнемоштени, па избирачките одбори доаѓаа во нивните домови.
Иако во вториот круг ќе гласаат многу помалку избирачи, сепак бројот на пријавените за гласање дома е поголем отколку во првиот круг во многу од општините.
Пред вториот круг од локалните избори во Македонија, денеска гласаа затворениците, болните, изнемоштените и раселените. Право на глас имаа околу 1.000 затвореници и 73 раселени лица.
Изборниот процес почна во седум часот и се одвивал без проблеми. Во затворот Идризово за 29. општини и град Скопје право на глас имаа 604 осуденици – само половината од околу 1.200 затвореници колку што издржуваат казна во затворот.
Зголемен број на болни и изнемоштени лица е пријавен во Источна Македонија, односно во Кочани, Делчево, Берово и Чешиново и Облешево.
Повеќе болни и немоќни гласачи имало и во Битола. Се пријавиле 206 лица, што е за 44 повеќе во однос на првиот круг.
Во Могила се пријавило 91 лице, во споредба со 55 гласачи од првиот круг, а во Ресен вкупниот број на болни и изнемоштени изнесува 300 лица, а во градот има 16.000 граѓани со право на глас.