Политички земјотрес во Чешка

Политички земјотрес во Чешка

Политички земјотрес се случува во Чешка по оставката на премиерот Петар Нечас. Раководството на владејачката коалиција се надева дека ќе успее да состави нов министерски кабинет и дека ќе добие поддршка од 101 пратенички глас во собранието.

Опозицијата бара распуштање на собранието и вонредни парламентарни избори откако веќе отпадна нејзината иницијатива за изгласување недоверба на владата, за што собраниска седница беше закажана за утре.

Премиерот Нечас поднесе оставја по избивањето на корупциски скандал во најблиското опкружување на премиерот. Минатиот четврток полицијата во ноќна рација во седиштето на владата, канцелариите на влијателните лобисти и во неколку државни компании уапси осуммина политичари и високи државни чиновници. Полицијата во триесетина рации досега запленила меѓу 4,7 и 5,8 милиони евра, како и десетина килограми злато.

Јана Наѓова, десната рака на премиерот Нечас и, според сознанијата на полицијата, негова љубовница, освен што е вмешана во корупцијата на тројца пратеници на владејачката партија кои добиле добро платени функции во државните компании за да се откажат од пратеничкиот мандат, ја злоупотребила и Воената разузнавачка служба нелегално давајќи задача да ја следат сопругата на премиерот, Радка Нечасова. Според сознанијата на полицијата, Наѓова го сторила тоа лани есента за да го натера Нечас да се разведе по 27 години брак со Радка, со која има четири деца. Воените разузнавачи имале задача да бараат докази за прељуба. Наѓова се брани тврдејќи дека сопругата на премиерот се зближила со некои луѓе од сектата на јеховините сведоци и дека почнала да собира пари за нив, па таа побарала тоа да се провери зашто се плашела дека може да избие скандал.

Во аферата се обвинети и двајца генерали – бившиот и сегашниот шеф на Воената разузнавачка служба, кои ~ излегле во пресрет на Наѓова. Експертите за безбедност тврдат дека на чешките воени разузнавачи ќе им биде потребно подолго време за да ја повратат довербата на сојузниците во НАТО откако се покажа дека Воената разузнавачка служба нелегално, послушно, ги извршувала наредбите на љубовницата на премиерот, за што Нечас тврди дека не знаел.