Околу 50 отсто од младите во Македонија се невработени, што е многу повисока стапка од вкупната невработеност во земјава. Тоа го покажува истражувањето што го направи Државниот завод за статистика (ДЗС) во соработка со Меѓународната организација на трудот (МОТ).
Од населението на возраст од 15 до 29 години, невработени со основно образование се 32 отсто, 51 отсто се со средно и 13,4 отсто се невработени со високо образование.
Сара Елдер од МОТ изјави дека Македонија има силен образовен систем со позитивно влијание кај младите кои се поуспешни во наоѓањето работа ако степенот на едукација е повисок.
– Но останува проблемот со една третина од младите кои имаат основно или пониско образование, кои се заглавени во процесот на премин кон пазарот на трудот. Кај нив веројатноста за наоѓање работа е многу мала. Младите често се вработуваат со привремени договори или се преквалификувани за работните места на кои се позиционирани. Така што, многу често може да се најде лице со универзитетско образование, а работи како продавач, рече претставничката на МОТ Елдер.
Министерот за труд и социјална политика Диме Спасов истакна дека Владата на РМ спровдува мерки и активни политики за намалување на невработеноста и дека резултатите се едвидентни.
Меѓу нив ги спомна можностите за самовработување, нивно финансирање, субвенционирање на вработувањето на младите, мерки за дополнителни обуки, како и практикантство кое овозможува побрз премин од образование во работа.