„Сакам да Ве информирам колку големо беше разочарувањето на присутните пратеници што Македонија не беше ни спомната во приоритетите, а уште поголемо кога амбасадорот објасни дека тоа е намерно, поради немање напредок во земјата“, му пишува денеска Лилјана Поповска на Валеријус Симулик, Претседател на Групата за меѓупарламентарна соработка со Западен Балкан.
По повод вчерашната презентација на aмбасадорот на Литванија во Македонија, Ренатас Јушка, за приоритетите на литванското претседателство со Европската унија, што се одржа во македонското собрание.
>>Македонија не е проиритет на литванското претседателство
„Притоа особено зачуди неговата реторика, несоодветна за дипломатската комуникација. Зачудени останавме и подоцна истиот ден, кога преку медиуми чувме поинаква изјава од министерот за надворешни работи на Литванија, г. Линкевичиус во Брисел, по што се наметна прашањето, дали амбасадорот говорел во лично име или во име на својата земја?“, пишува Поповска.
Ве замолувам, му пишува Поповска на Валеријус, преку Групата за меѓупарламентарни односи со Западен Балкан, да го иницирате спроведувањето на Препораката за неодложно започнување преговори за влез на Република Македонија во Европската унија, веднаш и без условување, со оглед на фактот што веќе четири години по ред добиваме позитивни извештаи за напредок во реформите.