Лилјана Поповска од ДОМ бара брз договор за голем пакет политичко-правни мерки за излез од кризата и враќање на довербата на граѓаните но таа исто така смета дека Груевски не е човекот кој треба да ги организира следните избори.
– Во политичкиот дел ќе треба се договори преодна влада со состав поинаков од досегашниот. За да може процесот да има кредибилитет треба да се изберат нови луѓе. Овде се работи за изгубена доверба и затоа е потребно да има луѓе во кои може да се има доверба. И ќе треба опозицијата да се врати во парламентот. Инаку таа нема да може да ја гласа ниту преодната влада, ниту пак ќе може да се гласа нов јавен обвинител кога сегашниот ќе се повлече, вели Поповска која учествуваше во дебата за кризата во Македонија во Европскиот парламент (ЕП) во Брисел.
Дебатата ја организираше групата на Зелените под раководство на Германката Ребека Хармс и имаше за цел да го информира ЕП за состојбата во Македонија и можните начини за излез од оваа ситуација.
Според Поповска, не е логично Груевски да остане на премиерското место и тој да ги организира идните избори:
– Тоа е прашање на логика. Тоа го бара ситуацијата. Мислам дека тоа ќе му даде можност тој како лидер да прави кампања, да се подготвува за следните избори. Ако се покаже низ судски процес дека она што го слушаме во разговорите не е вистина, ако се покаже дека било говорено но не било направено, тогаш тој може да ја добие довербата од граѓаните. Тоа е логичен начин на работење во оваа ситуација, вели Поповска потсетувајќи на изјава на бугарскиот премиер кој му порача на Груевски да даде оставка за да може повторно да се врати на политичката сцена.
– Средбата вчера не донесе ништо ново. Сите рекоа дека ќе се видат повторно, но очекуваме н
нешто поконкретно. Терминот април 2016 година кој е најавен како термин за избори се приближува и се троши време без де се влезе во конректни промени за тие избори, вели Поповска.
Поповска смета дека мора да се направи голем пакет на политичко-правни мерки кој ќе треба да биде задолжителен за сите политички партии:
– Ние имаме реална политичка криза во земјата. Во таква ситуација, ти мораш како политичар да се справиш со неа, независно дали тоа ти се допаѓа или не и дали си добил на избори или не… Мора понекогаш да се оди и против волјата и она што го сакаш. Нужно е да има предвремени избори. Тоа е единствен начин и вентил да се излезе на мирен начин од кризата и таа да не се прелее на улиците. Тоа беше главната причина и цел на нас од ДОМ да ги поттикнеме сите да седнат да разговараат.
На прашањето дали планот на Владата изработен по извештајот на Прибе е едно можно решение за кризата, Поповска вели дека само некој поинаква структура и други луѓе можат да ја вратат изгубената доверба на граѓаните.
– Ако веќе зборуваме дека во државата имаме криза настаната поради губиток на доверба кон одредена политичка елита, тогаш треба да дадеме шанса некоја друга структура да направи излез од кризата. Се разбира со конзенсус со постоечките структури. Но не со истите луѓе на исти позиции. Тоа нема да биде реално и нема да биде задоволително за огромна маса луѓе кои бараат промена за да и веруваат на држава. Страшно е како граѓанин да не им веруваш на својата држава и на своите институции. Тој процес на враќање на доверба мора да го прават сите заедно. Низ овие процеси за излез од политичка криза сите ние учиме да преговараме и да градиме консензуси.
Поповска во ЕП повтори дека е “битно ЕУ да го даде својот удел во оваа криза и да ги отвори поглавијата 23 и 24 кои се клучни и да почнеме преговори. Можеби може да се чини чудно сега во оваа ситуација тоа да се бара. Да, токму сега бидејќи Македонија ги заслужи тие преговори”, вели претседателката на ДОМ.