Кандидатот на ГРОМ, Зоран Поповски во Кавадарци вети дека нема да дозволи градење на споменици во Скопје.
Се соочуваме со сиромаштија и невработеност, со страв, луѓето не можат да го кажат своето мислење зашто се плашат од последици. Oва мора да престане за да почнеме да функционираме како нормална држава, рече на вечерашниот митинг во Кавадарци кандидатот за претседател на Македонија од коалицијата предводена од ГРОМ, Зоран Поповски.
-Јас ќе бидам вашиот мегафон, вашиот адвокат пред органите на власта. Нема да дозволам тромавата и неефикасна администрација да ве малтретира, сакам да знаете дека половината од луѓето во Кабинетот ќе бидат ангажирани исклучиво да работат со граѓаните и нивните тековни проблеми, нема да се занимаваме со работи кои нема да бидат од интерес на граѓаните, нема повеќе да се потпишуваат закони за извршување на буџет каде ќе бидат предвидени средства само за главниот град. Мора во придобивките од буџетот да уживаат сите граѓани, нема да дозволиме повеќе градење на споменици,на врби на фасади на тркала, сакаме да вложуваме во хидроенергетски системи, во патна инфраструктура и во нови работни места, рече Поповски во Кавадарци.