Од утринава РЕК Битола не произведува електрична енергија. Двата блока на РЕК Битола се во прекин и во моментов најголемиот енергетски капацитет не произведува струја.
Од ЕСМ информираат дека поради дефект од синоќа е исклучен Блок 1 од РЕК Битола. Се очекува дефектот да биде саниран до вечерните часови и блокот да биде повторно приклучен на електроенергетската мрежа.
– Заради дефект во котелот на Блок 1 за кој не постоеше никаква можност да биде саниран додека постројката е во функција, синоќа во 3 часот Блок 1 е исклучен од електроенергетската мрежа на државата. Станува збор за планско исклучување на блокот со цел санација на скинатата цевка што се смета за лесен испад на постројката, информираат денеска од компанијата.
Во РЕК Битола пред два дена избувна пожар кој направи сериозни оштетувања на трансформаторот на блок 3.
Инаку ЕСМ Продажба вчера објави дека склучила два договори со две различни фирми за набавка на 26.000 мегавати електрична енергија кои ќе чинат 5,5 милиони евра. Ова количество треба да ги покрие потребите за две недели, а испораката започнува од денес.
Се очекува до крајот на оваа недела да се одбере понудата за набавка на 900.000 тони јаглен за надминување на енергетската криза во земјата.