Нов притвор му се заканува на поранешниот министер за транспорт и врски, Миле Јанакиески. Откако денеска Апелацискиот суд го укина домашниот притвор на Јанакиески против кого се водат повеќе судски предмети, шефицата на Обвинителството за гонење на организиран криминал и корупција, Вилма Русковска најави дека ќе бара од судот да му биде определен притвор за случајот „Организиран крвав упад“ од 27 април 2017 година.
Сепак, ова барање дополнително ќе биде испратено до судот, откако Русковска ќе го добие решението кое го има донесено скопска Апелација.
– Ќе бараме притвор каков што баравме по објавување на пресудата. Ние сме доследни во ставот, вели Русковска за НоваТВ.
Скопскиот Кривичен суд во јули годинава донесе пресуда за вториот судски процес „27 април“ во кој се гонеа организаторите за „крвавиот четврток“. Јанакиески во овој случај доби казна од шест години и три месеци затвор. По објавата на пресудата, тогаш, обвинителството побара затворски притвор поради опасност од бегство, а судот процени дека Јанакиески е обезбеден и со мерката домашен притвор. А, на оваа затворска казна, Обвинителството веќе поднесе жалба преку која бара повисока казна за организаторите за упадот во законодавниот дом.
По три години Апелација одлучи да го пушти на слобода Јанакиески, а домашниот притвор да му го замени со мерки за претпазливост. Со оваа одлука, Јанакиески не смее да излезе надвор од границите на Град Скопје.