-Во Пржинскиот процес има одлагање, пропуштање рокови, тешкотии…. но, од овој процес нема бегање- ова е накусо пораката на либералот Иво Вајгл и демохристијанинот Едвард Кукан, кои со внимание следат се што се случува во Македонија. На денешната сесија на Комитетот за надворешни работи во Брисел на која беа присутни двајцата европратеници, Вајгл го презентираше својот нацрт извештај за Македонија, кој напролет, кога ќе биде изгласан од целиот Европски парламент (ЕП), ќе стане резолуција.
Овој документ подвлекува дека “според договорот од јуни и јули, новата Влада треба да биде именувана на 15 јануари 2016 година, 100 дена пред договорениот датум за предвремени избори”.
За НОВА Кукан вели дека неговата политичка група Народната европска партија, најголемата во ЕП, и ја дава својата поддршка на сегашната Влада “за да се најде политичко решение за кризата и да се исполни целиот договор од Пржино и со оглед на тоа што Груевски го потпиша токму тоа”, вели Кукан и објаснува:
„Целосно исполнување на Пржино значи дека, на пример, на 15 јануари 2016 година Груевски треба да даде оставка. Во таа смисла нашата политичка група го поддржува Груевски, за да се исполни договорот колку и да е тој тежок за примена. Но, тоа е единствениот начин да се излезе од оваа ситуација со политички средства. Токму тука ние го користиме нашето влијание”, заклучува пратеникот кој, заедно со Вајгл и Ричард Ховит ќе дојде во Македонија во јануари.
„Не треба да се драматизира доцнењето ако е тоа кусо и ако не го доведува во прашање процесот од Пржино. Но ако тоа има последици врз процесот тогаш е неприфатливо”, вели Вајгл и додава дека е особени важно најзначајните точки да бидат почитувани во одредените рокови како оставката на Никола Груевски на 15 јануари 2016 година.
„Изборите мора да се одржат на 24 април 2016 година како што предвидува договорот од Пржино и не смеат да се одложуваат. Одлагањето на изборите може да донесе повторна криза, овој пат со несогледливи последици”, вели Вајгл.
Овој извештај ги повикува, како и секоја година, земјите членки на ЕУ да отворат преговори за членство со Македонија. Но, за да може да дојде до овие преговори потребно е да се исполнат два услови.
„ЕП цело време го поддржува стартот на преговори и тоа сигурно пак ќе биде така кога ќе се усвои извештајот. Но потребно е да се исполнат два услови: целосна примена на договорот од Пржино и демократска реализација на предвремените избори кои ќе бидат прифатени од сите. За преговори, мора да се реши и проблемот со името”, Вајлг ја резимира за НОВА денешната парламентарна дебата во Брисел.
Нацртот на извештајот повикува за “регуларно и непречено работење на собраниската комисија за прислушувањето” и подвлекува дека треба да се обезбеди пристап до сите неопходни податоци, сведочења.
Идната резолуција изразува «жалење поради влошувањето на слободата на медиумите, загриженост поради понатамошна поларизација на медиумите, случаите на заплашување и автоцензура, системското политичко мешање во уредничките политики и лошите професионални стандарди помеѓу новинарите».
Рок за поднесување на амандманите за овој извештај е 14 јануари 2016 година. Извештајот треба да биде усвоен напролет но точниот датум се уште не е фиксиран.