Дел од министрите на ДУИ во Владата, предводени од вицепремиерот за Рамковниот договор Муса Џафери и министерот за одбрана Талат Џафери, 12- гидишнината од Рамковниот договор и годинава ќе ја одбележат со поклонување пред споменикот на борците на ОНА во кумановско Слупчане.
Поранешни војници на ОНА и селаните во Слупчане денеска соопштија дека се против доаѓањето на функционери Албанци на оддавањето почит на гробиштата на паднатите борци, јавува Алсат М.
Жителите велат дека причина за нивниот револт е непроменетиот статусот, тешката состојба во која се наоѓа селото, а особено семејствата на загинатите од овој регион. Тие се жалат дека немаат ниту вода за пиење, заборавен е законот за посебни права на воените инвалиди и семејствата на паднатите борци, а иако ветен уште во 2004 година, сè уште не бил подигнат ниту споменикот за загинатите.
Сепак вицепремиерот Муса Џафери вели дека ДУИ оваа година ќе продолжи да им оддава почит на паднатите борци во конфликтот од 2001 година во сите кризни региони, вклучувајќи го и Слупчане.
„Ние ќе им оддадеме почит на оние кои го дадоа својот живот за мир на 13 август во сите краишта каде има споменици и гробишта на паднати борци, како во Слупчане, Арачиново, Љуботен, Тетово и во другите краишта.“
Праксата со оддавање на почит за загинатите од ОНА од страна на министрите за одбрана и други владини функционери почна со Фатмир Бесими лани кога ја вршеше функцијата министер за одбрана.
Таквата постапка од униформирани припадници на АРМ тогаш ги заостри односите меѓу коалициските партнери што кулминираше со предложениот закон за бранителите од страна на ВМРО-ДПМНЕ која остана блокиран уште во собраниската комисија.