Украинскиот претседател Петро Порошенко смета дека падот на малезискиот авион во источниот дел на земјата во кој загинаа 295 луѓе е чин на терористички акт, јавуваат странските медиуми.
Првично од прес-службата на државниот врв изјавија дека „не ја исклучуваат” можноста авионот на малезиската авиокомпанија да е соборен. Тие се категорични дека украинските вооружени сили не вршеле истрели, кои би можеле да достигнат цели во воздух.
-Ова е трет трагичен случај во последните денови по авион Ан-26 и СУ-25 на украинските вооружени сили кои беа срушени од територијата на Русија. Нагласуваме дека вооружените сили на Украина не презеле акција против ниту една воздушна цел, а оние кои се виновни за оваа трагедија ќе бидат повикани на одговорност, изјави Порошенко.
Шефот на државата изрази сочувство на семејствата на жртвите и објави дека формирана е комисија со учество на експерти од Меѓународната организација за цивилна авијација (ICAO-) и на претставниците на Холандија и Малезија, која ќе ја испитува трагедијата со авионот.
Боинг-777 на „Малезија ерлајнс” сообраќаше од Амстердам до Куала Лумпур. Непосредно пред контролата над него да биде предадена од украинските на руските авиодиспечерите, тој исчезна од радарите на над 10 километри височина.
Урнатините од машината, заедно со телата на десетици загинати, беа откриени во Источна Украина во област каде што во последните неколку дена се водат борби меѓу украинската армија и проруски сепаратисти.