Темата на овогодинешното издание на АКТО 8 кое викендов се одржа во Битола беше „Час по природа и општество” во чии рамки се проследи кураторскиот проект насловен Живи библиотеки, архиви на граѓанската непослушност на Ивана Васева, Филип Јовановски, Јованка Попова.
Проектот подразбира процес на собирање и дистрибуирање на литература поврзани со создавањето на современи митови и нивно распознавање и влијание во современиот македонски контекст. Исто така и го отвора прашањето – Како и зошто имаме потреба од митови, кои се тие и зашто погрешниот избор и толкување претставуваат опасност во денешнината?
Универзитетскиот професор Никос Чаушидис се осврна на потребата од градење мит, како и неговото влијание врз промената на историјата.
„Современите митови ги гледаме денеска во Скопје, истакна Чаушидис ако сакаш да го поседуваш Ацо (Александар Македонски) направи ја неговата слика – икона. Кој има поголема икона на Ацо – Ацо е негов, рече Чаушидис.
„Активистот треба да создаде нова вистина за различноста, како што секоја љубов предлага ново искуство за вистината“, истакна Искра Гешоска, културен деец и претседателка на Јадро.
Свој удел во Лекцијата 1 Вагнер и Лист: Конструкции на современите митови имаа Роберт Aлаѓозoвски, Никола Гелевски, Искра Гешоска, Александар Стерјовски, Здравко Савески, Синоличка Трпкова, Бојан Иванов и други.
Само во текот на нивните излагање и презентации на книги беа собраа околу 40 книги. Според Ивана Васева овие живи библиотеки имаа интенција да се претворат во физички библиотеки. Донациите од индивидуалци, претставници на невладиниот сектор и организации и здруженија кои се согласни да делуваат во насока на градењето на отворено и современо демократско општество, се добредојдени.