Во Македонија има вкупно 12 заболени од морбили и сите се од Скопје, ја потврди денеска информацијата на НОВА, Институтот за јавно здравје. Најголем број од заболените дури осум не биле воопшто вакцинирани, двајца од нив примиле една доза на вакцина против мали сипаници, еден заболен ги има примено и двете дози од вакцината, а за еден од нив не е утврдено дали бил вакциниран. Меѓу заболените има четири деца до 14 години, другите се на возраст од 20 до 39 години. Од Институтот велат дека сите заболени живеат во Скопје, но не се епидемиолошки поврзани, односно немале контакт меѓу себе.
-Во моментот нема епидемија на мали сипаници, велат за НОВА од Институтот за јавно здравје.
Пред два дена НОВА објави дека во Скопје за само два месеца се регистрирани 11 случаи на морбили.
Извори за НОВА од тимовите кои вакцинираат велат дека среќна околност е што заболените не се поврзани меѓу себе и затоа се уште не може да се зборува за епидемија.
-Доколку барем два случаи беа поврзани меѓу себе, биле во меѓусебен контакт или се од ист клас, тогаш може да зборуваме за епидемија. Но и вака како што стојат бројот на заболени за толку краток период е голем, бидејќи претходните години сме имале по 2-3 случаи годишно, рекоа нашите извори.
Морбилите се многу заразна болест која лесно се пренесува преку допир на кожата или преку вдишување на респираторните секрети. Пациентите болеста може да ја пренесат во првите два дена пред појавата на симптомите и четири дена по појавата на осипот.
Првите симптоми се појавуваат по период на инкубација од 10 дена.
Во април 2011 во Македонија беше прогласена епидемија на морбили. Лекарите и сега стравуваат од појава на епидемија бидејќи вирусот циркулира во воздухот.
Епидемиолозите вината ја наоѓаат во слабиот одзив на вакцинацијата во последните години, поради кампањите против вакцинација во светот, па и кај нас во некои медиуми, но и во пропустите кои беа направени кај одредени генерации деца.
Токму поради ова во 2012 година потфрлила вакцинацијата, а родителите масовно одбивале да ги вакцинираат своите деца.
Трендот на бојкот на редовната вакцинација продолжува и покрај казните од државата.
Според податоците од Државниот санитарен и здравствен инспекторат минатата година 47 родители заработиле прекршочни пријави бидејќи одбиле да ги вакцинираат своите деца.
Десет од нив одбиле да ги вакцинираат девојчињата против ХПВ, а останатите 37 не сакале да ги вакцинираат против ди-те-пер, мали сипаници и заушки. Казните за оние што одбиваат задолжителна вакцинација се движат од 300 до 650 евра.