Првиот човек на Центарот за управување со кризи (ЦУК), Стојанче Ангелов на прес конференција за пожарот во тетовската фабрика „Пофикс“, говореше за алармантната состојба во која се наоѓа територијалната противпожарна единици од овој град која не е многу поразлична од останатите територијални единици. Поради тоа рече Ангелов дека се размислува повторно да се централизираат овие служби зашто децентрализацијата покажала лоши резултати со оглед на слабата финансиска кондиција на одделни општини кои се впрочем надлежни за функционирањето на противпожарните единици.
„Тетовската противпожарна единица брои 60 лица на околу 40 години. Располагаат со две цистерни стари по 25 години, потребни се уште две. Имаат 4 цистерни без црева само за вода, стари по 30 години. Потребна е пропратна механизација од скали до црева, пумпи, теренски возила. Сите пожарникари имаат лична заштитна опрема стара 20 години, потребна е нова, изјави меѓу другото директорот на ЦУК, Ангелов.
Тој сепак им оддаде почит на командантите на тетовската противпожарна единица Ука Алити и Авни Амети за нивните натчовечки напори при гасењето на пожарот и недозволување да се прошири истиот. Ангелов рече дека негова била проценката, во гасењето на пожарот да се вклучат и хеликоптери.
Тој истакна дека спецификација на потребните ресурси ќе биде направена за сите територијални противпожарни единици во земјава и дека таа информација ќе влезе на Влада и рече ќе се дадело се од себе средствата што се имаат да бидат подобро употребени за опремување на овие служби.
„Проблеми ќе има летово доколку дојде до големи пожари. Останатите држави тоа го решаваат со противпожарни друштва, кои се ангажираат во клучниот период на пожари. Се разбира дека капацитетите што ние ги имаме не се доволно пополнети, на пример во Тетово имаат потреба од уште 20 пожарникари, изјави Ангелов додавајќи дека ваквата состојба се провлекува со години но дека Владата се решила да надминува еден по еден проблем во оваа свера.
Прес конференцијата на Ангелов доаѓа по почетокот на увидот денеска во поранешниот тутунски комбинат „Македонија табак“ каде во понеделникот избувна пожарот што предизвика голема материјална штета а беа повредени околу петнаесет пожарникари.
Утре состанок треба да одржи и Општинскиот кризен штаб, информира градоначалникот Биљал Касами.
(М.Т.)