Позитивен книжевен осврт кон хрватското објавување на наградениот македонски роман „Дваесет и првиот“ на Томислав Османли под насловот „21 – книга на фантазми“ беше објавен во специјализираната емисија „Библиовизор“ на Третата програма на Храватското радио.
Автор на прилог посветен на романот на Османли е книжевниот критичар Божидар Алајбеговиќ, кој истакнува дека со комбинирање на различни стилски фигури и дискурси и со продири на фантастика во реалноста и на минатото во сегашноста, Томислав Османли создава сложен, постмодернистички и убедлив роман за хаотичноста на животот на преминот на милениумите.
Според хрватскиот книжевен критичар станува збор за еден вешто структуриран, богат и слоевит ракопис во кој авторот бројните ракавци на приказната, ги води суверено и на тој начин го гради дејството на својата книга.
Иако во нијансите на овој роман повеќе ќе ужива македонскиот читател, ќе наспомне критичарот Божидар Алајбеговиќ, и домашниот реципиент никако не би требало да го пропушти романот на Томислав Османли, вели книжевниот критичар на Хрватското радио.
Романот „Дваесет и првиот“ беше прогласен за Рoман на годината во 2010, а во септември минатата година се појави во превод на хрватски јазик во издание на загрепски „Сандорф“.