По синоќешниот решавачки натпревар помеѓу Уругвај и Јордан, со вкупен резултат 5:0, Уругвај е последната земја која им се придружува на останатите 31 земји за Светското Првенство во Бразил. Извлекувањето на групите е закажано за 6 декември.
Од минатото првенство во Јужна Африка, 24 од 32те земји кои сега настапуваат, настапувале и тогаш. Годинава за прв пат со деби-настап на едно Светско Првенство ќе учествува и репрезентацијата на Босна и Херцеговина која во квалификациите беше една од најимпресивните репрезентации, а во моментов е рангирана на 16то место на ФИФА листата.
Она што по завршувањето на квалификациите и бараж мечевите е најинтересно, тоа е како ФИФА ќе ги распореди репрезентациите во пресрет на ждрепката.
Иако постојат одредени турбуленции, се очекува Бразил и најдобрите седум селекции од октомвриската листа на ФИФА да се најдат во првиот шешир, а останатите репрезентации да бидат распределени според географската припадност, а не според пласманот на ФИФА ранкингот.
Носители: Бразил, Шпанија, Германија, Аргентина, Колумбија, Белгија, Уругвај, Швајцарија.
Останати учесници на Мундијалот:
Јужна Америка: Чиле, Еквадор
Азија: Јапонија, Австралија, Иран, Јужна Кореа.
Европа: Холандија, Италија, Русија, БиХ, Англија, Грција, Хрватска, Португалија, Франција
Африка: Брег на Слонова коска, Камерун, Гана, Алжир, Нигерија.
Северна Америка: САД, Мексико, Костарика, Хондурас.
Светското првенство во Бразил ќе се одржува од 12.јуни до 13.јули на 12 стадиони. Во пресрет на извлекувањето на групите, единствено е познато дека Бразил ќе биде на позицијата А1 и дека натпреварите во групната фаза ќе ги игра во Сао Паоло, Форталеза и Бразилија.