Пратениците на ВМРО-ДПМНЕ нема да гласат за потврдување на петте одлуки на претседателот Стево Пендаровски. По координацијата е донесена одлука да не ги гласаат одлуките на претседателот Стево Пендаровски, за воведување на вонредна состојба во државата на почетокот од епидемијата со корона вирусот, бидејќи сметаат дека тој ја злоупотребил вонредната состојба во земјава за предизборни цели и заради лошо справување со пандемијата со КОВИД 19.
Како што изјави пратеникот Антонијо Милошоски постојат три причини поради кои ВМРО-ДПМНЕ нема да гласа за одлуките на Пендаровски.
-Затоа што тие биле донесени за справување со здравствената криза, а сега ситуацијата на тој план, според нив, е полоша, затоа што целта на овие одлуки била да се надминат економските последици од ковид-кризата, а сега економската ситуација е уште полоша, и затоа што техничката влада ја злоупотребила ситуацијата за да носи уредби со законска сила кои не биле неопходни.
Претседателот на Собранието, Талат Џафери на утринскиот брифинг изјави дека нема да ги става петте точки денеска на гласање, туку само ќе се утврди дневниот ред на седницата. Рече дека ќе ја почека одлуката на партиските тела на ВМРО ДПМНЕ, поради што рече дека не сака да ги става пред свршен чин.