Со Света Василева литургија утрово во храмовите на Македонската Парвославна Црква – Охридска архиепископија ќе се одбележи поменот на Свети Василиј Велики, кој се упокоил на овој ден. Тој е еден од тројцата најголеми црковни учители од четрвтиот век. Родум бил од Кападокија, завршил школа во Атина. Бил голем христијански философ, а се прославил и како епископ и заштитник на чистотата на православното учење. Се упокоил во 379 година.
Денеска е и празникот познат уште како Обрезание Господово.Осмиот ден после раѓањето, Христос бил однесен во храмот и обрезан. Во Стариот завет со тоа се запечатувала припадноста на народот наследник на Божјите ветувања. Обрезанието инаку е праслика на тајната на крштението и како такво има значење и во новозаветната Црква. Овој празник се празнувал уште во првите векови на христијанството.
Според Јулијанскиот Календар, денеска е прв ден од Новата Година. Граѓаните ја нарекуваат Православна, Српска или Стара Нова Година. Во пресрет на истата или денеска, во домовите се крши лепче со паричка и тој на кого ќе му падне паричката се смета дека ќе биде среќен целата година.