Грчкиот премиер Андонис Самарас добил предлог од својот тим за организирање предвремени избори, но се уште не го разгледал сериозно тој предлог, бидејќи смета дека трипартиската Влада, со која раководи има уште задачи и оти не треба да бидат спречени напорите што таа ги прави, пишува весникот „Вима“.
Весникот тврди дека авторите на предлогот се централни фигури во Министерскиот совет, а приврзаници за организирање предвремени избори имало и меѓу други блиски соработници на премиерот.
„Овие гласини се неосновани, не станува збор за предвремени избори“, изјавиле високи владини претставници, но признале деке евентуалните предвремени избори би можеле да и бидат од корист на партијата Нова демократија.
Според аналитичарите предвремените избори сепак ги поткопале напорите, што премиерот ги вложува во период од една година за враќање на загубената доверба, иако има и контраргумент дека коалициската Влада не може долго да опстане поради внатрешните несогласувања меѓу лидерите на трите партии, пренесува Нетпрес.
„Нема се да кренеме во воздух“, изјавиле владини претставници, кои се повикуваат на анкетите, според кои повеќето Грци негативно се настроени кон прашањето за евентуални предвремени избори.
Засега избори не сакаат не само грчките граѓани, туку и Европската унија и Меѓународниот монетарен фонд, кои нагласуваат дека за предвремени избори не мора ниту да се помисли, бидејќи Владата треба да ги насочи своите сили за да ги исполни обврските кон внатрешните кредитори, нагласува „Вима“.