Советот на Општина Центар денеска не успеа да ги разгледа урбанистички планови кои ја вжештија атмосферата изминатиов месец.
Третото продолжение на седницата што се одржа денеска, по двочасовна расправа и неколку паузи не беше успешно.
И покрај сите овозможени услови за работа, седницата на Советот беше одложена со образложение од претседавачот, Мирослав Шиповиќ, дека советниците од ВМРО-ДПМНЕ не сакаат да работат.
„Очигледно е дека на вас не ви се работи и затоа ја одложувам седница за 11 јули“, пресече претседателот на Советот, Мирослав Шиповиќ.
Спорно за советничката група на ВМРО-ДПМНЕ беше отсуството на градоначалникот Жерновски.
Според нив точките на дневен ред се од голема важност, па затоа и присутвото на Жерновски било неопходно.
Отсуството на Жерновски, со чие пристигнување ќе можеше да се одблокира седницата и да продолжи расправата по точките, беше оправдано со службени должности.
Градоначалникот утринава имал средба со претставници на ОБСЦЕ.
Советот по 5-тата седница, од чија агенда останаа само ДУП-овите, ќе заседава на 11 јули, а ден претходно ќе ја одржи 6-тата седница. Советот се распушта на 15 јули за летните одмори, а повторно се враќа на работа еден месец подоцна.
Инаку расправата за оваа точка од дневниот ред се одложува веќе неколку недели, откако група демонстранти протестираа пред и во општинскиот двор кршејки прозорци со цел да се повлече наводниот предлог за сопирање на изградбата на црквата „Св. Константнин и Елена“.
Тогаш советниците кои се мнозинство во општината уверуваа дека овој објект не предмет на расправа и не е засегнат со измените на ДУП-от. Со исти тврдења излезе и градоначалникот Жерновски со цел да се одвлечат демонстрантите и да се овозможи фунционирањето на Советот.
За разлика од пред десетина дена, овој пат пред општинскиот двор беше мирно.