Претседателот на Владата Зоран Заев денеска ја прими амбасадорката на Соединетите Американски Држави во нашата земја Кејт Мари Брнз која на почетокот на средбата го изрази своето, како и сочувството на народот на САД за жртвите од пожарот во модуларната КОВИД-19 болница во Тетово.
Премиерот Заев информирал дека е во тек сеопфатна истрага за случајот во која покрај домашните, се вклучени и експерти од СР Германија во делот на форензиката за да се утврдат најточните причини за пожарот со трагични последици.
-Претседателот на Владата Заев и амбасадорката Брнз истакнаа дека денешната средба се остварува на денот кога пред 26 години двете земји воспоставија дипломатски односи на ниво на амбасади, дека Северна Македонија и САД продолжуваат да ги продлабочуваат меѓусебните односи и соработка, како и застапувањето и афирмацијата на заедничките вредности во НАТО. Амбасадорката Брнз се заблагодари за поддршката на Република Северна Македонија во прифаќањето на граѓаните на Авганистан и нагласи дека гестот на нашата земја е силна порака како постапува земја сојузник и членка на НАТО, пишува во владиното соопштение.
На средбата станало збор и за соработката меѓу двете земји на економски план, при што бил поздравен интересот на американските компании да бидат дел од процесите за транзицијата на од фосилни кон обновливите извори на енергија, што доаѓа како резултат на позитивните политики што на овој план ги спроведува Република Северна Македонија.
Како позитивна била оценета определбата на Владата за справување со корупцијата при што било истакнато дека кампањата за борба против оваа појава има за цел не само да ја промени перцепцијата, туку и системски да ги елиминира причините за коруптивно однесување.
Премиерот Заев во разговорот со амбасадорката Кејт Брнз истакнал дека процесите за почеток на локалните избори, како и текот на пописот се одвиваат според предвидената и очекувана динамика.
-САД и Северна Македонија, со меѓусебната почит како стратешки партнери, се посветени на заедничките заложби и вредности за безбедност, слобода и демократски просперитет во регионот, како и на заедничките активности во борбата против тероризмот и против другите закани за мирот ширум светот, претходно напиша на Фејсбук премиерот Зоран Заев потсетувајќи дека на 13 септември 1995, тогашниот претседател на Соединетите Американски Држави, Бил Клинтон ја објави коресподенцијата со претседателот на Република Македонија, Киро Глигоров со која се потврдува одлуката на САД за воспоставување дипломатски односи меѓу двете земји, само две години по отворањето на Канцеларијата за врски на Америка во Скопје.
-Со нашето полноправно членство во НАТО, пријателството со САД доби нова димензија во зајакнувањето на безбедноста, слободата и демократскиот просперитет на Република Северна Македонија и во целиот регион, пишува Заев на Фејсбук.
Според него, громна е поддршката на САД и преку донациите доделени преку различните проекти и програми на УСАИД во Северна Македонија. Таа поддршка, додава Заев, ја покажува длабоката почит на САД за Северна Македонија, која за нас е исклучително важна и во спроведувањето на нашата агенда за реформи.