„Премиерот Груевски и Владата ги потценуваат македонските професори, се обидуваат да ги дисциплинираат, а ја девалвираат целокупната македонската наука, изјави на прес-конференција Татјана Прентовиќ, Член на Извршен одбор на СДСМ.
– Со барањето на Груевски и на Владата професорите да користат преведена странска литература наместо учебници и скрипти, власта директно се замеша и во науката.
– Во скриптите и напишаните книги од македонски автори се наоѓаат научни истражувања со податоци важни за Македонија, што ги нема во странските книги што ги препорачува Груевски. На нив, некои македонски научници го посветиле целиот свој живот. Токму од нивните предавања произлегле низа интелектуално здрави генерации.
– Невозможно е премиерот да знае повеќе од професорите што е најдобро за студентите, со оглед на нивното искуство и знаење во областите за кои предаваат и чии предметни програми се соодветни на акредитираните студиски програми на факултетите.
– Учењето само по странски научни дела е класично деградирање на македонската наука и отвора можност за нејзино уништување, вели Прентовиќ.
СДСМ се согласува дека државата треба да обезбеди достапност до врвната светска научна литература што може да се вгради во високообразовните програми, но исто така сметаме дека од интерес на македонската наука е да се зголеми буџетот за домашната издавачка дејност. СДСМ планира удвојување на овие средства веднаш по смената на власта.