Шпанската владеачка партија Народна партија (НП) и повеќе нејзини поранешни членови вчера беа осудени за корупција. Вкупно 37 лица беа осудени на 351 година затвор а самата партија беше осудена да врати 250.000 евра во државната каса поради нелегално финансирање на партиски митинзи.
Во 40 години демократија, ова е прв вака голем скандал на корупција во најголемата партија на Шпанија на чие чело стои премиерот Мариано Рахој. Се работи за скандалот Гуртел, институционализиран систем на корупција помеѓу партијата и мрежа приватни фирми.
Социјалистичката опозиција побара интерпелација за Рахој и предвремени избори. За да успее, оваа интерпелација треба да собере апсолутно мнозинство од 176 гласа во Парламентот и да го поддржи кандидатот што ќе биде предложен за составување на нова влада.
Левата партија Подемос најави дека ќе ја поддржи интерпелацијата против владата на Рахој.
Премиерот ја одби оваа опција но нема сомнение дека ова е голем удар врз неговата влада којшто нема да помине без големи последици и го доведува во прашање опстанувањето на владата.
Сите партии во земјата се оградија од владеачката партија. Центристите од Куидаданос со претседателот Алберт Ривера, партијата која му даваше поддршка на Рахој и му дозволуваше да остане на власт, исто така се огради од него. Куидаданос најави дека на 11 јуни ќе разговара за оваа нова ситуација и “ќе донесе одлуки што ќе ги спречат можните штети за демократијата”.
Претприемачот Франциско Кореа е осуден на 51 година затвор. Тој беше централната фигура во мрежата која доведе во огромно мито кое завршувало на сметките на партијата.
Поранешниот сметководител на партијата Луис Барценас ќе мора да мине 33 години во затвор и 44 милиони евра казна. Истрагата утврди дека Рахој му пратил смс порака на охрабрување во 2013 година во која вели: “Луис, држи се.”
Помеѓу осудените се поранешни градоначалници на НП, екс секретар на партијата, поранешен советник за спорт на Мадрид и поранешна министерка на партијата.
Судењето траеше 11 месеци, помеѓу ноември 2016 година и октомври 2017 година. Системот на корупција се одвивал помеѓу 1999 година и 2005 година во Мадрид и неговата околина. Судот утврди “автентичен и ефикасен ситем на институционализирана корупција преку механизам на јавни договори” помеѓу корумпирани членови и пратеници на Народната партија и фирми кои се виновни за измама, корупција, перење пари, тргување со влијание и проневера на јавни средства.
Истрагата исто така утврди постоење на “паралелно сметководство” на НП и “црна каса” во која се слевале нелегалните пари. Овој факт може да доведе до ново судење во наредните месеци. Премиерот Рахој беше повикан како сведок во текот на судењето, во јули 2017 година. Тогаш тој изјави дека такво паралелно сметководство не постоело. Судиите оценија дека неговото сведочење не е “веродостојно”.
Народната партија најави жалба на пресудата велејќи дека се работи за локалните избори во 2003 година и дека “партијата не може да биде во тек со трошоци што го правел еден кандидат на индивидуална основа”.
Партијата исто така тврди дека се работи за неколку “изолирани случаи” и покрај тоа што во моментов се води истрага за корупција против десетици лица од партијата во цела Шпанија. Според нив, главните скандали се јавиле во времето кога партијата ја водеше Хозе Мариа Азнар додека Рахој станал претседател во 2003 година.