Британскиот министер за финансии Џорџ Озборн, со задоволство ја дочека веста дека британските оф шор зони и се придружија на владината стратегија за глобална финансиска транспарентност.
Ова е пресврт во борбата против даночните затајувачи и сомнителните финансиски трансакции.
Кајманските острови, кои први изразија подготвеност за почитување на стандардите и поголема транспарентност, ги поттикнаа и другите оф шор зони кои се под Британска ингеренција: Ангуила, Бермуди, Британските девствени острови, Монстерат, како и островите Туркс и Каикос.
На спогодбата се придружи и Гибралтар каде, како дел од ЕУ веќе се применуваат одредени директиви за транспарентност. Наведените оф шор зони се согласиле да воведат автоматска размена на податоци, билатерално со Велика Британија, како и мултилатерално со земјите од Г5 – Британија, Франција, Германија, Италија и Шпанија.
Оваа спогодба и овозможува на Велика Британија, како и на другите земји кои се приклучија на спогодбата, автоматски да добиваат податоци за банкарските сметки на своите даночни обврзници во наведените оф шор зони.
Податоците вклучуваат имиња, адреса, датум на раѓање, број на сметка, како и состојба на конто и трансакции извршени преку тие сметки.
Ова исто така подразбира и информации за сметките, кои се сопственост на приватни лица, како трустовите.
Покрај наброените на иницијативата и се придружи и Isle of Man како и Guernsey кои ќе бидат предводници во воведувањето на транспарентност на сопственоста на компаниите, затоа што многумина не ги користат оф шор компаниите само за да избегнат данок, туку и за да ја сокријат сопственоста.