Годинава како никогаш досега македонските работници се понижени и обесправени, а нивниот труд воопшто не е вреднуван. Наместо подобри услови за работа, повисоки плати, работниците во Македонија трпат секојдневни притисоци и добиваат откази во услови кога нивните трошоци за живот вртоглаво растат. Животот кој им се ветуваше, се претвори во беда и безнадежно секојдневие, мислејќи како до крајот на месецот да заврзат крај со крај, се наведува во честитката на лидерот на ВМРО-ДПМНЕ, Христијан Мицкоски за Меѓународниот ден на трудот 1 Мај.
Мицкоски обвинува за тоа дека работниците биле под притисок и уцени и не можеле да си го искористат слободно своето уставно загарантирано право на штрајк.
– Пари за наставниците, администрацијата и останатите работници нема. Во меѓувреме животот станува се поскап. Над 500.000 македонски граѓани не можат да си дозволат барем еден оброк во денот, а растот на цените на горивото, електричната енергија и основните продукти само ја зголемува оваа бројка, се наведува меѓу другото во честитката на Мицкоски.
Потребно е национално обединување против елитата на власт и предвремени парламентарни избори за излез од кризата. Само така ќе дојдат подобри времиња, подобар стандард и вреднуван труд на македонскиот работник, порачува Мицкоски во честитката.
Честит 1-ви Мај!
Честит Ден на Трудот!