Во галерискиот простор на Македонскиот културен центар во Њујорк , САД, денеска завршува изложбата „Арс Акта 001“ на македонските реномирани уметници Борис Шемов, Игор Сековски и Радмила Ончевска. Изложбата која дел од Годишната програма на Министерството за култура предизвика голем интерес и внимание кај њујоршката културна јавност.
Една од клучните определби на овие автори е новата, свежа полетност на македонската уметност која ги вклучува македонските уметници во најсовремените текови на уметнички практики, наведувајќи ги да експериментираат во новите медиуми, компјутерски обработки на делата и инсталации во просторот. На изложбата претставени се дигитални принтови на текстил и хартија и видео. Ончевска се претстави со делото „Ентер“ (Enter), Шемов со „Шеринг екстенжнс“ (Sharing extensions) и Сековски со „Шитана“ и „Ај вонт ту би јор дог!“ (I want to be your dog).
Досега во Центарот кој претставува простор за презентации и промоција на македонската современа култура, но и место за размена на искуства и соработка меѓу уметниците, со поддршка на Министерството за култура реализирани се над 100 проекти. Реализацијата на овие проекти е потврда дека Македонскиот културен центар во Њујорк продолжува со традицијата на континуирано претставување на македонската култура во една од најважните светски културни метрополи.