Според изјавите на еден од преживеаните, во бродот со мигранти кој се преврте минатата ноќ во Средоземно море, имало околу 950 луѓе.
Оваа информација ја дал преживеан од Бангладеш, а ја соопшти обвинителот на Катанија Џовани Салви.
Претходните информации кои италијанските власти ги соопштија беа дека на бродот имало 700 луѓе.
А спасувачката операција за наоѓање на преживеани продолжува и денеска. Сепак мали се надежите за наоѓање на преживеани од трагедијата. Во моментов потврдена е смртта на 24 лица.
Верзијата на властите дека мигрантите се поместиле на една страна од бродот и затоа потонал, ја негира преживеаниот од Бангладеш. Тој вели многу од мигрантите останале заробени во бродот додека тонел.
Според него, шверцерите ги заклучиле вратите од подолните нивоа на бродот.
Малтешкиот премиер Џозеф Мускат последнава трагедија ја опиша како “ништо поразлично од геноцид“.
Она што е најстрашно е дека изминатиов период повеќе од 900 мигранти се верува дека загинале обидувајќи се да го поминат Медитеранот, што е многу повеќе од истиот период минатата година.
– Масовна гробница е креирана во Медитеранските води а одговорни се европските политики, вели Лорис де Филипи, претседател на меѓународната група за помош “Доктори без граници“.
Шефовите на дипломатиите на земјите членки на Европската унија закажаа состанок во Луксембург на кој во најголем дел ќе разговараат за проблемот со мигрантите.
Европските функционери велат дека потонувањето на бродот со имигранти во неделата е најтешката трагедија од овој вид досега, имајќи го предвид бројот на лицата кои се сметаат за исчезнати.
Бродоломот се случи на 70 милји од италијанскиот брег, во близина на островот Лампедуза.