Каролина Гочева, синоќа ја промовираше својата најнова песна „Бегај, бегај“. Оваа песна е „cover“ верзија на насловната тема од култната македонска серија „Трст Виа Скопје“.
Композитор е легендарниот музичар Кокан Димушевски, текстот за оваа песна го направи Весна Малинова, а аранжманот е на Никола Мицевски – човекот кој го направи „Македонско девојче 2“.
Со оваа песна се најавува големиот концерт на Каролина кој ќе се одржи во арената Борис Трајковски на 13-ти декември.
Инаку албумот „Македонско девојче 2“ на Каролина Гочева кој на македонскиот пазар се појави во февруари годинава, ќе добие свое регионално издание кое ќе се најде на музичкиот пазар на просторите на сите бивши ЈУ држави.
Како издавач се појавува Далас рекордс – една од водечките дискографски куќи во регионот што со своите изданија рушеше рекорди во продажбата во изминатите 20 години, со албумите и изведувачите меѓу кои Џибони, Северина, Бајага и многу други еминентни музички имиња од бившите Ју-простори.