Актуелниот претседател на Друштвото на филмски професионалци на РМ е нелигитимен и не е законски претседавач со институцијата. Го нема депонирано сопствениот потпис и сите одлуки потпишани од Горјан Тозија се невалидни, објаснуваат во своето писмо до колегите, Томи Салковски и Игор Иванов, по повод закажаната седница за 4.април на Управиот одбор на ДФРМ во кој една од точките на дневен ред е и „извештај на претседателот на ДФРМ“.
Во писмото се вели:
„Почитувани колеги,
Ве известуваме дека закажаното собрание на Друштвото на филмски професионалци на РМ е нелигитимно и со крајно проблематични конотации.
Имено, во Централен регистар на РМ, како што може да видите од приложените документи, за претседател на друштвото фигурира Роберт Насков. Актуелниот претседател, бидејќи не е заведен во ЦРМ (четири и кусур години од стапување на функција) е практично нелегитимен и не е законски претседавач на оваа институција.
Тој го нема депонирано ниту сопствениот потпис, па оттаму сите одлуки потпишани од страна на Г. Тозија се невалидни. Воедно, управниот одбор кој има законска обврска да достави одлука за промена на структурата на друштвото, еве, веќе два изборни мандати го нема тоа направено.
Исто така, мандатот (иако нелегитимен), на актуелното раководство е истечен, а не постои точка на дневен ред за избор на нов претседател и орагани на управата…“, стои во писмото.
Салковски и Иванов уште потенцираат и дека на дневен ред во неколку наврати не се заведува точка на дневен ред за расправа за изборот на македонски претставник за наградата Оскар, кога комисијата во состав Горјан Тозија, Лабина Митевска, Сашко Коцев, Дуле Кардалевски и Игор Алексов – Битлс донесоа одлука Македонија да нема претставник.
>> Скопје Филм Студио: Срамна е одлуката за неучество на Оскар
– Од повеќемина стручњаци од областа на правото ни беше образложено дека поради нелегитимноста на претседателот и управниот одбор, имаме неоспориво право да ја отповикаме одлуката на комисијата, избрана од претседател без формален легитимитет, а со тоа да побараме и судска разврска, како и валоризација за нанесената штета (која патем е огромна и на финансиски и на професионален план) – стои понатаму во писмото на Салковски и Иванов до нивните колеги.
– Ова раководство, исто така тенденциозно и безскрупулозно, меѓу останатото сака да му го одземе на собранието (највисокиот орган на друштвото) правото за избор на директор на фестивалот Браќа Манаки, а таквото право да му припадне на управниот одбор. Тоа е уште една потврда за присвојување, елитизирање, претворање на оваа легендарна институција во „приватен посед“ за остварување лични интереси, велат тие, образложувајќи дека одбиваат учество на собранието закажано за 4.април бидејќи е поднесено од како што велат „нелигитимен претседател, нелигитимен управен одбор, за кои стојат нелигитимни одлуки“.
Продуцентот Салковски и режисерот Иванов бараат отповикување на Тозија и управниот одбор, без право на понатамошно учество во органите на управата, формирање на комисија со цел повикување на одговорност за недомаќинското работење, скандализирање и приватизирање на оваа институција, избор на комплетно ново раководство кое ќе работи според законите на РМ и статутот на ДФРМ и ќе ги нормализира состојбите, во корист на филмските работници.