Професорите на Стоматолошкиот факултет од денеска нема да учествуваат во донесување на никакви одлуки на Факултетот, се додека со него раководи и претседава, како што велат, незаконски избраната вд. деканка проф. Мирјана Поповска. Тие одбиваат да учествуваат во работата на телата и органите, но ќе извршуваат наставна дејност. Со ова се доведува во прашање функционирањето на Факултетот и запишувањето на студентите во идната академска година. Професорите кои денеска излегоа јавно, го повикаа ректорот Никола Јанкуловски да ја преиспита својата одлука и да го назначи регуларно избраниот декан професорот Ќиро Ивановски. На Академскиот проглас, се потпишани 23 професори од Стоматолошкиот факултет.
“Продолжуваме да ги извршуваме нашите педагошки активности, предавања , консултации и испити и с е што е во интерес на студентите. На ректорот Никола Јанкуловски му кажавме на неговото грубо погазување на автономијата на Универзитетот во однос на изборот на проф. Ќиро Ивановски за декан на Стоматолошки факултет кој со мнозинство на гласови го утврдивме на 12 декември минатата година. Упативме барање до ректорот да го назначи Ивановски за декан, а на оваа наша иницијатива се приклучија и 220 студенти и специјализанти , како и мнозинството колеги избрани на научни и соработнички звања“, др. Силвана Георгиева професорка на Стоматолошки факултет.
Георгиева потенцира дека се свесни за последиците кои ќе произлезат од ова, но вели дека и покрај сите напори да с е надмине овој проблем во академски дух, одговорноста треба да се бара во ректорот. Факултетот вака како што е сега, со вд. Деканот не функционира, не е свикан наставно научен совет, ниту факултетска управа. Професорите велат дека воопшто не биле информирани за назначувањето на вд. Декан за што дознале случајно, пребарувајќи во архивата.
„Така ја дознавме вистината дека Стоматологија има вд. Декан“, рече Георгиева.
Регуларно избраниот декан проф. Ќиро Ивановски посочи дека ситуацијата ја испитувал просветниот инспекторат и Министерството за образование , каде што имало барање да се испита постапката на ректорот но досега нема никаков одговор.
„Мнозинството членови на наставно научниот совет одлучиле да не учествуваат во работата на органите и телата на Факултетот. Ниедна од причините кои му даваат право на ректор да не ја потпише одлуката за назначување не е нарушена„, изјави професорот Ќиро Ивановски.
Причините за ваквата незаконска одлука на ректорот, да не го признае законски избраниот ректор не се познати, но се претпоставува дека лежат во учеството на Ивановски во Професорскиот пленум. НОВА побара објаснување од ректорот Никола Јанкуловски но, тој го одбегна одговорот и рече дека е на службен пат во Виена.