Владо Бучковски, Љупчо Зиков и Минчо Јорданов, утре официјално ќе ја промовираат својата Граѓанската иницијатива за позитивна Македонија.
„Во Позитивна Македонија сме здружени, и обединети граѓани од град и од село! Ние знаеме што треба и како треба да ја направиме посилна, поуспешна и попривлечна нашата Татковина Македонија! Да ја направиме Македонија земја на можности за сите кои сакаат да живеат, да работат, да создаваат семејство и свое огниште овде! Дома. Големи можности за сите без разлика на пол, вера, националност и други разлики…
– Затоа, почитувани наши пријатели би биле пресреќни да ни се придружите на патот на остварувањето на оваа благородна и благословена мисија”, стои во соопштението од Иницијативниот одбор.
Како што изјави Љупчо Зиков за НОВА неодамна, Бучковски е еден од иницијаторите на Движењето Граѓани за позитивна Македонија, заедно со Минчо Јорданов. Се уште лидерската позиција не е дефинирана, со оглед на фактот што одлуката ќе биде донесена на Конгресот на ова Движење.
Се најавува дека движењето ќе прерасне во партија ако во скоро време се донесе одлука за предвремени парламентарни избори.
Утре се очекува и да се обзнанат и останатите членови на движењето: 40-тина проминентни интелектуалци, уметници, бизнисмени и спортисти од сите политички провиниенции, а акцентот е на јавни личности кои до сега не се бавеле со политика.
Зиков за НОВА најави дека ќе се повлече од функцијата главен и одговорен уредник од групацијата Капитал во оној момент кога ќе дојде до формирање на движењето.
Промоцијата на Граѓанското движење – алијанса за позитивна Македонија, ќе биде во среда на пладне, на „Качанички пат 47-б” Визбегово во објектот „Голд Клуб”.