Вториот роман на новинарот Дејан Трајкоски “Неверство” ќе биде промовиран вечерва во 20 часот, во Галеријата на Младинскиот културен центар.
Книгата ќе ја претстават писателите Венко Андоновски, Ермис Лафазановски и Александар Прокопиев, а извадоци ќе читаат актерот Жарко Димоски и режисерот Димче Николовски. Рецензент на романот е Андоновски кој, меѓу другото, истакнува оти “Неверство” привлекува од првата реченица и е исклучително елегантно напишан роман.
Според Прокопиев, Трајкоски се устоличува како особено име во новата македонска книжевност.
Трајкоски е дипломиран професор по филозофија, идеен автор и директор на интернационалниот литературен фестивал “ПРО-ЗА Балкан”. Работи како новинар во дневниот весник “Вечер”, и член е на Интернационалната федерација на филмски критичари ФИПРЕСЦИ. Пред две години го издаде романот “Вистина, љубов” (Рашомонијада).