Во понеделник на 3.ноември во Салонот 19.19 ќе биде промовирана монографијата „Снежана Османли – жената која можеше да гледа и зад ридот“ од Атанас Кировски а во издание на ИП „Култура“.
Книгата вклучува искази на 25 истакнати личности од дипломатскиот, политичкиот, научниот, деловниот и општествениот живот посветена на личноста и дејноста на М-р Снежана Османли (1954-2013), угледен и агилен политички работник – во преломните мигови на македонскиот општествен и политички процес, од преминот на социјалистичкото во плуралистичкото општество, до македонската независност и стекнувањето меѓународен легитимитет.
Снежана Османли понекогаш била единствен сведок, а редовно активен и позитивен учесник во процесите на првичаната демократизација, плурализација и државно осамостојување на Македонија.
Помеѓу авторите на прилозите се јавуваат амбасадорите Виктор Комрас, Патрик Крисман, Љубица Ж. Ачевска, Филип Т.Рикер, потоа Петар Гошев, Таки Фити, Ѓунер Исмаил, Љубомир Д. Фрчкоски, како и новинари и аналитичари како Горан Михајловски, Бранко Героски, Сашо Орданоски и Ацо Кабранов.
Монографијата е создадена по иницијатива и со поддршка на Трифун Костовски, претседател на невладината организација и група за критичко мислење и анализа „Совет за глобална соработка“ од Скопје, чијшто идеен покренувач и активен потпретседател беше токму Снежана Османли.
Освен Трифун Костовски како промотор на монографијата уште се јавува и академик Таки Фити.
