Првата Британска бизнис асоцијација (ББА) во државава, организација чија цел е унапредување на трговските врски со Обединетото Кралство, застапување на интересите на британските компании во земјава и останати компании кои имаат британски бизнис интереси, денеска беше промовирана во Амбасадата на Велика Британија во Скопје. Основачи на Асоцијацијата се компаниите Џонсон Мети и Сопро и рудникот САСА.
-Северна Македонија е најголемиот трговски партнер на Обединетото Кралство во Западен Балкан. Го цениме ова партнерство и ќе продолжиме да ја надградуваме оваа успешна приказна и да ги зајакнуваме нашите трговски врски. Како силен партнер и близок пријател заинтересирани сме и подготвени да бидеме ваш претпочитан трговски и инвестициски партнер преку нашите индустриски способности, инвестициски екосистем и владина поддршка. Британските бизниси застапуваат транспарентност, одржливост, иновација, соработка и партнерство, а токму целта на ББА е да ги промовира овие вредности во рамките на македонското деловно опкружување во тесна соработка со сите чинители, рече британскиот амбасадор Метју Лосон на промоцијата на Асоцијацијата.
Нагласи дека формирањето на ББА е пресвртница во одбележувањето на, како што рече, силните трговски односи меѓу двете земји во годината кога се одбележуваат 30 години од воспоставувањето на дипломатските односи.
Тој додаде дека од потпишувањето на договорот за партнерство, трговија и соработка меѓу двете земји на 3 декември 2020 година Амбасадата ги разгледува можностите за идно поддржување на растот на трговските односи.
-Северна Македонија е најголемиот трговски партнер на Обединетото Кралство на Западен Балкан, најмногу благодарение на присуството на фабриката за катализатори Џонсон Мети, која сочинува околу 16% од БДП на земјата. Искрено сум задоволен што претставниците на компанијата се дел од основачите на оваа Асоцијација, покрај рудникот Саса и Сопро. Доказ за тоа колку ги цениме нашите партнерства во Западен Балкан – и веруваме во неговата развојна стратегија – е фактот што Министерството за гарантирање на извозните кредити на Обединетото Кралство, Агенцијата за кредитирање на извозот на Обединетото Кралство, неодамна значително ги зголеми ограничувањата за земјите со што компаниите кои имаат пристап до 4 милијарди фунти помош кои се однесуваат само на Северна Македонија, рече претставникот за трговски врски со Западен Балкан, Мартин Викерс и додаде дека во нивниот фокус е инфраструктурата, енергијата, рударството, одржливиот развој, здравството, безбедноста и одбраната.
Викерс истакна дека Обединетото Кралство е светски лидер во многу сектори и дека се подготвени да го поддржат натамошното проширување на комерцијалните односи меѓу британските и македонските компании.
Во одговор на прашањето на новинарката на ЦивилМедиа Викерс посочи дека има и други британски компании заинтересирани за инвестиции во земјава и додаде дека ќе ги охрабри да дојдат и да инвестираат.
Извор: Цивил Медиа