Откако Албанија потврди дека САД побарале сирискиот арсенал на хемиско оружје да се уништи на нејзина територија, бројни граѓани се собраа пред парламентот во Тирана на протест против таквите планови, јавува сараевскиот портал Klix.ba.
„САД не контактираа, но одлука не е донесена. Сите одлуки ќе бидат транспарентни, а во предвид ќе биде земен интересот на земјата. Мислам дека Албанија нема капацитет за такво нешто. Дури и поголеми и поразвиени земји одбија тоа да го направат“, изјавил парламентарот Ирил Мета за Klix.ba.
Активистите бараат од албанската влада да ги одбие сите барања на странските влади за помош при уништувањето на сириското оружје во земјата.
„Власта не смее да дозволи уништување на хемискиот арсенал на албанско тло. Албанија мора одлучно да се спротивстави на таквите барања. Албанија нема капацитети и не треба да биде канта за отпадоци, ниту да ги загрозува животите на своите граѓани“, рече пред демонстрантите Саига Гури од невладината алијанса против увозот на отпад.
Норвешка, Франција, Белгија и Албанија се спомнати како можни локации за уништување на целиот сириски арсенал хемиско оружје, проценето на околу 1.000 тони.