Романот на Џорџ Орвел „1984“, издаден 1949 година, го опишува тоталитарното општество во кое оние што се на власт ги користат најсовремените технологии и психологијата за да владеат со народните маси. Откако Доналд Трамп стана претседател, „1984“ стана една од најпродаваните книги на „Амазон“, а сега арт кината во САД и Европа во знак на протест против претседателот на Америка, ја прикажуваат филмската адаптација на романот.
„1984“ е најпознатиот роман на Орвел, симбол на предупредување на идните генерации од опасноста на тоталитарниот режим, а неговата популарност го достигна врвот последните месеци откако светот е соочен со апсурдноста на политичкото владеење на Доналд Трамп.
Во знак на протест против загрозувањето на слободата на мислата и демократијата, кинотеките во 165 американски градови и 43 држави на 4 април ќе ја прикажат филмската верзија на книгата на Орвел со Џон Харт во главната улога од 1984-та година.
„Многумина од нас се свесни за тоа дека вистинските човекови вредносни денеска се загрозени. „1984“ на Орвел проговори токму за тоа и затоа не треба да се чудиме зошто таа книга и денес е актуелна“, изјави Дилан Сколник, директор на Синема Артс Центар и еден од организаторите на прикажувањето на филмот низ Америка.
Главниот лик на романот е Винстон Смит, ситен службеник во Министерството за вистина, задолжен за режимска пропаганда, кој станува разочаран од својот живот и се обидува да направи радикална промена која завршува со негово апсење и мачење. Всушност се работи за личното искуство на авторот поврзано со шпанската граѓанска војна, но и презирот против идеологиите на фашизам и комунизам.
Датумот на прикажување, 4 април, не е случаен. Имено, на тој ден во романот е почетокот на бунтот на главниот јунак, кога Смит почнува со забрането пишување на сопствен дневник.
Портретот на Орвел на влада која произведува сопствени факти, бара потполна послушност и ги уништува своите непријатели, никогаш не била поактуелна, пишува во службената најава за прикажување на филмот.
„Време е да заземеме став и да почнеме борба за зачувување на слободата на говорот, почитување кон сите луѓе и вистината“, стои во најавата.
Една од главните теми на „1984“ е цензурата на Министерството за вистина, каде фотографиите се ретушираат, а јавните архиви се менуваат, за да се ослободат од „незгодните луѓе“.
Џорџ Орвел бил псевдоним на британскиот пистател и новинар Ерик Артур Блер. Почина од туберколоза на 47 години, само една година по издавањето на „1984“, чија популарност не ја доживеа.