Во текот на минатата ноќ на социјалните мрежи се појавија стотици информации поврзани со нападите во Париз. Еден добар дел од нив не беа точни.
Имаше погрешни информации и редица манипулации а некои од нив имаа за цел да предизвикаат реакција кај граѓаните и да ги наведат на погрешни заклучоци, да предизвикаат омраза против муслиманското население или бегалците.
Францускиот весник Л Монд објави текст во кој се наведуваат погрешните информации и зошто овие лаги се објавуваат објаснувајќи дека секоја информација која ќе се најде на интернет треба добро да се провери.
Така, вчера беше објавено дека четворица полицајци загинале во нападот во Батаклан. Тоа не е вистина но точно е дека еден полицаец бил ранет во Батаклан и дека еден полицаец загинал во улицата Шарон каде што исто така имаше напад. Но овие двајца полицајци биле во цивил и не учествувале во акцијата.
Синоќа многу интернет корисници тврдеа дека во Германија имало спонтана манифестација за поддршка на Франција. Беше објавена и слика. Но фактите велат дека во Германија немало никаков протест а објавената слика датира од декември 2014 година и на неа се членовите на анти-имигрантското движење Пегида.
Оваа фотографија не е сликана непосредно пред нападот во Батаклан како што можеше да се прочита на Твитер или Фејсбук синоќа.
Синоќа се прошири информација дека републиканскиот кандидат за претседател на САД Доналд Трамп испратил порака на Твитер во која се вели: “Интересно е дека оваа трагедија се случува токму во земјата во која има најстриктна контрола на носење оружје во светот.”
Пораката беше толку веродостојна што на неа на Твитер одговори и францускиот амбасадор во Вашингтон велејќи дека пораката е одвратна.
Порака на Трамп беше испратена во јануари годинава по нападите во Шарли Ебдо но Трамп синоќа одлучи да биде достоинствен и преку Твитер испрати порака во која се вели дека неговите молитви ги испраќа до жртвите и заложниците и побара од Бог да биде со нив.
Помеѓу останатите погрешни информации беше и таа дека Ајфеловата Кула ги изгаснала светлата и дека Емпајр Стејт зградата се обоила во трите бои на Франција.
И ова не е точно.
Гасењето на светлата на Ајфеловата Кула е дел од нејзиното нормално фукнционирање и таа ги гас светлата секоја ноќ во еден часот.
Но, во црвено-бело-сино се “облече” Фридом Тур, кулата изградена на местото на Ворлд Треј Центер кој беше урнат по нападите во САД во 2011 година.
Голема манипулација е информацијата дека во бегалскиот камп во Кале (до тунелот на Јуростар помеѓу Париз и Лондон) некој подметнал пожар. Оваа вест возбуди огромен број корисници на интернет. Некои се радуваа што и бегалците страдаат во оваа трагична ноќ во Франција но најголемиот број очајнички се обидуваа да објаснат дека бегалците не се виновни и дека и тие бегаат од тероризам.
Градоначалникот на Кале потврди дека имало пожар но тој не бил подметнат туку избил случајно по лоша манипулација на шише гас.
Конечно, на Фејсбук ноќеска се појави информација дека Ангела Меркел поднела оставка и дека сите овие настани докажуваат дека избива трета светска војна. Текстот предизвика редица коментари на уплашени корисници на интернет.
Се разбира, не треба посебен доказ за да се знае дека оваа вест не е точна. Меркел е се уште германска канцеларка.