НОВА дознава дека во понеделник во Брисел е закажана првата средба помеѓу ВМРО-ДПМНЕ и СДСМ. Опозицијата ќе ја претставува Радмила Шеќеринска а во име на власта на средбата треба да учествува министерот за надворешни работи Никола Попоски.
Учеството на Попоски се уште не е конечна одлука на ВМРО-ДПМНЕ. Според некои информации од Европскиот парламент, можно е во Брисел да дојдат и двајца претставници на власта.
Од европска страна на средбата има тројца пратеници од Европскиот парламент (ЕП): Едвард Кукан од демохристијанската група, либералот Иво Вајгл (известувач за Македонија во ЕП) и Ричард Ховит од групата на социјалистите.
Европските пратеници очекуваат во Брисел да допатуваат високи претставници на двете партии кои ќе имаат мандат да донесат и одлука доколку тоа биде потребно.
Ова е прв обид за преговори помеѓу двете македонски партии. Тројцата европски пратеници ќе бидат само олеснувачи во овој процес што значи дека тие нема да излезат со свои предлози пред македонските партии туку ќе очекуваат од нив да кажат кои се нивните предлози за излегување од кризата.
Се уште нема “сценарио” за понатамошните чекори. Европјаните се надеваат дека и со една средба може да се најде компромис но доколку тоа не биде случај, тие се спремни за нови рунди на преговори, во Брисел, Стразбург или Скопје.
На семинарот што во понеделникот и вторникот се одржа во Брисел на тема “политичка култура”, ВМРО-ДПМНЕ и СДСМ веќе ги изнесоа своите видувања на кризата. Според СДСМ потребни се оставки во власта за да се отвори пат за решавање на кризата, додека според ВМРО-ДПМНЕ политичката борба треба да се сведе на институционално дејствување.
Според европската “тројка”, двете партии треба да се фокусираат на европската иднина на земјата и препораката за преговори која не смее да се загуби и околу сето тоа да најдат заеднички терен и политичко решение. Ваквото решение потоа треба да обезбеди простор за независно делување на правдата и решавање на сите спорни точки.