Интернационалниот фестивал на филмска камера „Браќа Манаки“ од Битола и „Институт Јунус Емре“ од Скопје утревечер во 20 часот ќе ја одржат на проекцијата на филмот „Сивас“ во киното „Синеплекс“ (сала 6) во Скопје.
Повод за проекцијата е наградата „Златен Манаки“, што режисерот Каан Муждеџи ја доби на неодамна завршениот фестивал, во програмата „СЕЕ Камера“.
Муждеџи ќе биде гостин на настанот и ќе се обрати пред публиката.
„Сивас“ е турско-германска копродукција снимена во 2014 година. Муждеџи е автор и на сценариото, а исто така е и продуцент на филмот. „Сивас“ е негов прв долгометражен игран филм. Кинематографери на филмот се: Норвежанецот Армин Диролф и Германецот Мартин Солванг.
Престижниот Венециски филмски фестивал лани му ја додели „Специјалната награда од жирито“.