Рускиот претседател Владимир Путин изјави дека е подготвен да разговара со САД за војната во Украина, но постави крајно барање – целосно предавање на Украина, според американскиот Институт за проучување на војната -ISW во најновиот анализа.
Аналитичарите на Институтот тврдат дека Путин вчера наводно свикал состанок на Советот за безбедност на Руската Федерација, на кој заедно со министерот за надворешни работи Сергеј Лавров ја потврдиле подготвеноста на Русија за мировни преговори со новата администрација на американскиот претседател Доналд Трамп.
Се наведува дека Путин нагласил дека секое мирно решение треба да се заснова на „отстранување на основните причини“ на конфликтот, што според него вклучува исполнување на тешките барања на Русија.
–Високите функционери на Кремљ, вклучувајќи ги Путин и Лавров, повторија во последните неколку недели дека Кремљ одбива да разгледа какви било компромиси со барањата на Путин кон крајот на 2021 и почетокот на 2022 година, кои вклучуваат Украина да остане трајно „неутрална“ и да не се приклучи кон НАТО, наметнување строги ограничувања на големината на украинската армија и отстранување на актуелната украинска влада – се наведува во анализата на ISW.
Путин исто така рече дека поранешниот американски претседател Џо Бајден во 2021 година предложил да се одложи пристапот на Украина во НАТО за 10-15 години, но и тоа не ја спречило руската инвазија, која тој ја опиша како одговор на заканата од инвазија на НАТО.
Вчера, по претседателската инаугурација, по четири години, Доналд Трамп се врати во Овалната соба на Белата куќа и оттаму порача дека Путин ја „уништува“ Русија со тоа што одбива со договор да ја заврши војната во Украина.