Со разрешувањето на сите управни одбори од страна на Владата парализирана е работата на Управниот одбор на ФЗОМ, кој е надлежен орган за одлучување во втор степен по жалби за лекување во странство, обвинува актуелниот директор на Фондот за здравство Сашо Стефановски. Тој во писмото до министерот за здравство Арбен Таравари прашува кој ќе ја понесе одговорноста од ваквите одлуки со кои, како што вели, дека директно се загрозува здравјето на граѓаните.
„Колега Таравари, дали знаете, ако е точно тоа што го прочитавме во одредени медиуми, дека со одлука на Влада се разрешени сите членови на Управниот одбор на ФЗОМ? Доколку е тоа точно, тогаш Ве прашуваме, кој ќе ја понесе одговорноста, зошто Вие и Владата ги разрешивте сите членови на Управниот Одбор на ФЗОМ, кој е надлежен орган за одлучување во втор степен по жалби за лекување во странство, со што ја парализирате институцијата во носење на одлуки и директно го загрозувате здравјето на осигурениците“, се вели во писмото од Сашо Стефановски до Таравари, упатено и до медиумите.
Писмото доаѓа како одговор на Таравари каде тој во изјава за порталот сдк.мк вели дека Стефановски не одел на работа и го игнорирал Министерството за здравство.
„Еве конкретно се случува директорот на Фондот Стефановски да не оди на работа и ги игнорира сите институции и да не крева телефон на Министерство за здравсто. Ќе биде сменет многу скоро“, вели Таравари.
Генералниот секретар на Владата, Драги Рашковски за НОВА потврди дека до вторник ќе бидат избрани нови управни одбори секаде, па така и во Фондот за здравствено осигурување. Тој порача директорот на ФЗОМ да не прави непотребна драма околу сето тоа.
„До вторник ќе бидат назначени нови управни одбори, така ќе биде и во Фондот за здравство. Нека не драматизираат, ова е нормална процедура така што за неколку дена нема да се смени ништо“, изјави Рашковски за НОВА.
Владата пред три дена ги разреши сите управни и надѕорни одбори на јавните претпријатија, здравствените и другите државни установи и агенции. Како што беше соопштено, тоа било направено за да се спречат натамошните штети по буџетот поради неодговорниот однос на одделни членови на овие одбори. Имено, како што се наведува, постоеле информации дека тие потпишувале штетни менаџерски договори и именувале луѓе на менаџерски позиции со астрономски плати.
Инаку, директорот на ФЗОМ го бира Владата, но изборот се развлече и не се знае кој ќе застане на чело на здравствената каса. Таравари за НОВА најави дека до вторник ќе биде именуван и нов директор на ФЗОМ.