Позлатен мебел, колекција на дела од познати сликари, вредни сувенири од целиот свет ќе му остави разрешениот српски владика Василиј Качавенда на својот наследник во Владичанскиот двор во Бијелина.
Ова „парче небо на земјата“, како што го нарекуваше Качавенда, или мал Версај, како што го викаат обичните луѓе, е симбол на луксуз и однесување кое не му прилега на еден епископ, по што е познат Качавенда, сега разрешен поради блуд, пренесува српски „Блиц“.
На екипата на „Блиц“ при посетата на седиштето на Зворничко-тузландската епархија не и било откриено дали тој е се уште тука, за неговото идно престојувалиште накнадно ќе одлучи Синодот на СПЦ.
Ретки теписи, позлатени лустери во стилот на француските кралеви, оригинали на слики од српски автори, комоди, амфори и вредни сувенири од целиот свет. Голем дел од скапоценостите ќе бидат изложени во идниот музеј на епархијата.
Близу манастирската црква Свети Василиј изградено е и гробно место за Качавенда.
„Велеше дека сака после смртта неговиот наследник да го отвори прозорецот и најпрво што ќе види да биде гробницата во која почива човекот кој сето ова го изгради“, раскажува изворот на „Блиц“ од епархијата.