Хелсиншкиот комитет за човекови права го презентираше годишниот извештај за инциденти поттикнати од говор на омраза
Зголемен е бројот на инциденти предизвикани од говорот на омразата. Годишниот извештај на Хелсиншкиот комитет забележа пораст од 60% во бројот на инциденти во 2016, во споредба со 2015, односно 44 случаи во 2015 наспоти 70 случаи во 2016.
Од тие случаи забележан е најголем пораст (320%)во бројот на случаи чии мотиви се политичка определба или убедување.
Во 2016 година се забележани инциденти со расна мотивација па така 33% од жртвите на овие злосторствата на насилство имале статус на бегалец или мигрант. Во извештајот како илустрација се наведува нападот врз тројцата државјани од Мороко во близина на Демир Хисар на 6 јануари оваа година
Во 2015 и 2016 година немало регистриран случај на злосторство на омраза поради сексуална ориентација или родов идентитет, но Парламентот сѐ уште ги нема вклучено овие карактеристики како основа за можна дискриминација и злосторства на омраза, се наведува во извештајот на Хелсиншкиот комитет.
Во 2016 Хелсиншкиот комитет регистрира нов пораст на вакви инциденти со етничка позадина. Забележани се помеѓу членови на македонската и албанската етничка заедница по неколкугодишен значителен пад на истите. МХК напоменува дека политичките партии често користат говор на омраза на јавни дебати и во текот на предизборните кампањи.
Најголемиот дел од инцидентите (70%) се случиле во Скопје и скопските подрачја, но значаен дел од инцидентите се случиле долж паневропскиот коридор Х каде бегалците се движеле патувајќи кон ЕУ. Претежно вршители се млади луѓе, вандали и ограбувачи. 18 од случаите имаат идентификувани сторители, додека 23 се под истрага, а дури за 29 случаи нема конкретни информации за сторителите.
„Нема систематско собирање на податоци од пријавувањето, истражувањето и гонењето на говорот на омраза и злосторствата од омраза. Податоците собрани од граѓанското општество покажуваат дека властите не постапуваат соодветно со таквите злосторства“, изјави Уранија Пировска, извршен директор на МХК.
Во заклучокот на извештајот МХК ги дава следниве препораки со цел да се спречат ваквите инциденти.
(1) проширување на рамките на кривичното законодавство, опсегот на казниви дела за злосторствата од омраза и вклучување на други мотиви за пристрасност на овие дела, (2) навремена и ефикасна истрага и гонење на овие инциденти, (3) да се превземат соодветни мерки за да се олесни пријавувањето злосторства од омраза од страна на жртвите, (4) да се собираат и објавуваат сеопфатни податоци за злосторства на омраза, (5) да се осигура пружана помош, поддршка и заштита на жртвите, (6) да се промовираат обуки за релевантни практичари и (7) да се подобрат превентивните мерки за овие инциденти како едукација за човековите права.
При крајот на прес конференцијата, иако сѐ уште нема готов извештај за 2017 година, Уранија Пировска го нарече нападот врз парламентот на 27ми април „најтешкото дело на омраза“, тврдејќи дека овој инцидент бил предизвикан од говор на омраза. Хелсиншкиот комитет има поднесено специјален извештај до Специјалното јавно обвинителство (СЈО) со препорака за поднесување на кривична пријава за инцидентот.